2 Samuel 20
1 在吉甲有一個敗類安到示巴，係便雅憫支族人比基利个孻仔。佢歕羊角喊講：「大衛㧯𠊎等無關係！耶西个孻仔對𠊎等全無好處！以色列人哪，轉老屋來去！」
2 所以，以色列人全部離開大衛，跈比基利个孻仔示巴去。總係猶大人還係對大衛王忠心，跈王對約旦河到耶路撒冷。
3 大衛王轉到耶路撒冷王宮，將佢以前留下來看守王宮个十個細姐關起來，供給姖等所需要个一切，總係毋㧯姖等同房。姖等一生人關在冷宮，像寡婦一樣。
4 王對亞瑪撒講：「去召集猶大人，三日內㧯佢等轉到這位來。」
5 亞瑪撒就去召集猶大人，總係佢無在王規定个時間內轉來。
6 所以大衛對亞比篩講：「驚怕比基利个孻仔示巴對𠊎等个傷害比押沙龍還較大。你帶𠊎个軍隊去追佢！若係無，佢會佔領防衛个城市，愛捉佢就難了。」
7 所以約押个軍隊，該兜做宮廷侍衛隊个基利提人㧯比利提人，並所有个勇士全部跈亞比篩共下離開耶路撒冷去追示巴。
8 佢等追到基遍个大巖石該位个時，亞瑪撒來迎接佢等。該時約押著等戰甲，腰間繫刀鞘，刀仔在刀鞘內。約押向前行个時，佢个刀仔對刀鞘內跌下來。
9 約押對亞瑪撒講：「朋友，你平安無？」就用正手捋亞瑪撒个鬍鬚，愛唚佢。
10 亞瑪撒無提防約押另外一支手所揢等个刀仔；約押用這刀仔刺入佢个肚笥，腸肚流在地泥下。約押毋使刺第二下，亞瑪撒就死掉。約押㧯厥老弟亞比篩繼續去追比基利个孻仔示巴。
11 有一個約押个僕人企在亞瑪撒屍體堘頭喊講：「順服約押㧯大衛个人全部應該跈約押去！」
12 亞瑪撒个屍體歸身係血，睡在路中央。約押个僕人看到過路个人全部企下來，就將屍體拖到田肚，㧒一領衫將它遮等。
13 屍體對路上徙開以後，大家就跈約押去追比基利个孻仔示巴。
14 示巴行過以色列逐支族个地區，來到亞伯‧伯‧瑪迦；所有比基利宗族个人全部集合起來，跈佢入城。
15 約押个軍隊聽到示巴在該位，就去圍攻該城。佢等對等城个外牆，起攻城个土堆，又用槌仔撞城牆，愛使城牆橫下來。
16 城肚有一個聰明个婦人家對城牆頂喊講：「聽啊，聽啊！去請約押到這位來；𠊎愛㧯佢講話。」
17 約押行近去；該婦人家問：「你係約押麼？」佢講：「係啊！」該婦人家講：「請聽使女个話。」約押講：「好，你講。」
18 該婦人家講：「老古人言講：『到亞伯去請教』，事情就會得到解決。
19 𠊎等這城肚个人係以色列當中最和平、忠誠个人。你做麼介愛毀滅這偉大个城呢？你愛吞掉上主个產業係麼？」
20 約押應講：「𠊎絕對毋會毀滅你等个城！
21 該毋係𠊎等个計劃。有一個人名喊示巴，係比基利个孻仔，對以法蓮山區來。佢煽動人悖逆大衛王。你等將這一儕交出來，𠊎就下令撤退。」該婦人家對約押講：「𠊎等會對城牆頂將佢个頭那㧒給你！」
22 所以姖向城肚个人民獻計謀；佢等就將示巴个頭那剁下來，對城牆頂㧹給約押。約押就歕羊角，佢个軍隊就離開這城，轉屋下去了。約押轉到耶路撒冷去見大衛王。
23 約押做以色列全軍隊个元帥；耶何耶大个孻仔比拿雅做大衛个侍衛長、統管基利提人㧯比利提人；
24 亞多蘭做苦工个總管；亞希律个孻仔約沙法做歷史官；
25 示法做王室書記；撒督㧯亞比亞他做祭司；
26 睚珥人以拉也做大衛个一個祭司。